Os ydych chi'n byw mewn cartref gofal ac wedi bod yn talu'r costau cartref gofal eich hun gan fod gennych gynilion ac asedau dros y terfyn cyfalaf presennol o £50,000, rydych chi wedi bod yn hunan-ariannu. Llywodraeth Cymru sy'n pennu'r terfyn cyfalaf a gall newid.
Unwaith y bydd eich arian yn mynd o dan y terfyn cyfalaf, rydym yn galw hyn yn 'gyllid gostyngedig'.
Pryd i ofyn am help gennym
Cysylltwch â ni o leiaf 6 mis cyn i'ch cyllid gyrraedd £50,000 i roi amser i ni gael popeth yn ei le cyn i'ch arian redeg allan. Os yw eich arian wedi gostwng o dan y terfyn cyfalaf, dim ond o'r dyddiad y gwnaethoch gysylltu â ni y gallwn ddarparu cyllid.
Beth sy'n digwydd nesaf?
Byddwn yn cwblhau asesiad lles gyda chi i ddeall eich anghenion gofal a chymorth cymwys presennol. Bydd angen i ni wneud hyn hyd yn oed os ydych chi wedi cael eich asesu gennym ni neu gan awdurdod lleol gwahanol o'r blaen.
Byddwn yn cwblhau asesiad ariannol gyda chi i gyfrifo faint y bydd angen i chi ei dalu tuag at eich costau gofal unwaith y byddwch wedi cyrraedd y terfyn cyfalaf. Byddwn hefyd yn gweld a oes ffyrdd o gynyddu eich incwm drwy wiriad budd-daliadau.
Pan fyddwn wedi cwblhau'r asesiadau hyn, byddwn yn trafod yr opsiynau sydd ar gael i chi unwaith y bydd eich cyllid yn cyrraedd £50,000.
Yn ystod yr asesiad ariannol byddwn yn edrych yn ôl ar eich cyllid dros y blynyddoedd diwethaf, gan gynnwys unrhyw eiddo y gallech fod wedi bod yn berchen arno cyn symud i'r cartref gofal. Bydd angen i ni weld tystiolaeth o sut y defnyddiwyd eiddo neu asedau. Er enghraifft, os gwnaethoch werthu eich eiddo i ariannu eich costau cartref gofal, neu ei drosglwyddo i rywun arall. Os mai'r ail opsiwn ddigwyddodd, byddwn yn trafod beth mae'n ei olygu i amddifadu eich hun o asedau a sut y bydd hyn yn effeithio ar y cyfraniad y disgwylir i chi ei wneud.
Bydd dewis peidio â chwblhau'r naill asesiad neu'r llall yn golygu na fyddwn yn gallu darparu cyllid a bydd angen i chi barhau i dalu eich costau cartref gofal eich hun yn llawn.
Opsiynau
Unwaith y byddwn wedi cwblhau eich asesiad, byddwn yn trafod yr opsiynau sydd ar gael i chi.
Os yw eich asesiad yn dangos nad yw eich anghenion gofal cymwys ar lefel sy'n gofyn am ofal mewn cartref gofal, mae'n annhebygol y byddwn yn gallu eich cefnogi gyda chyllid i aros mewn cartref gofal. Byddwn yn egluro opsiynau fel addasiadau i'r cartref neu lety â chymorth a allai fodloni eich anghenion.
Os yw'ch asesiad yn dangos bod gennych anghenion gofal a fyddai'n cael eu diwallu orau mewn cartref gofal, bydd yr hyn sy'n digwydd nesaf yn dibynnu ar b'un ai a ydych chi am aros yn yr un cartref gofal ai peidio.
Os yw eich ffioedd cartref gofal presennol ar yr un lefel neu lefel debyg i'r hyn y byddem fel arfer yn ei dalu tuag at lefel y gofal sydd ei angen arnoch a'ch bod am aros yno, bydd unrhyw gyllid rydych yn gymwys amdano yn dechrau pan fydd eich arian yn cyrraedd y terfyn cyfalaf.
Os yw eich ffioedd cartref gofal presennol yn fwy nag y byddem fel arfer yn ei dalu am lefel y gofal sydd ei angen arnoch, byddwn yn chwilio am gartref gwahanol a fydd yn diwallu eich holl anghenion gofal cymwys a allai gostio llai.
Os yw eich ffioedd cartref gofal presennol yn fwy nag y byddem fel arfer yn ei dalu am lefel y gofal sydd ei angen arnoch ond eich bod am aros lle rydych chi, dylech ofyn i ni am ychwanegiadau trydydd parti. Dyma lle mae rhywun, ffrind neu berthynas fel arfer, yn cytuno i dalu unrhyw gostau ychwanegol i'ch helpu i aros yn eich cartref gofal presennol.
Os nad oes unrhyw un i dalu'r ychwanegiadau a bod modd diwallu eich anghenion yn rhywle arall, mae'n debygol iawn y bydd yn rhaid i chi symud i lety addas arall na fyddai'n gofyn am ychwanegiad trydydd parti. Byddwn yn ystyried unrhyw effaith y byddai symud i gartref gofal gwahanol yn ei chael arnoch chi ac yn trafod hyn gyda chi.
Gallwch ofyn i eraill, fel teulu, gymryd rhan yn yr holl drafodaethau a phenderfyniadau hyn. Lle y bo'n briodol, byddwn yn gofyn i unrhyw un sydd â'r awdurdod cyfreithiol priodol i'ch cynrychioli chi gymryd rhan hefyd. Er enghraifft, perthynas â'r Atwrneiaeth Arhosol gofrestredig berthnasol neu Lys a benodwyd yn ddirprwy.
Gofal Nyrsio a Ariennir
Os ydych chi mewn cartref nyrsio, ac angen gofal nyrsio, efallai eich bod eisoes yn derbyn Gofal Nyrsio a Ariennir (GNA). Mae hyn yn golygu eich bod wedi cael eich asesu fel rhywun sydd angen gofal nyrsio a bydd y GIG yn talu rhywfaint o'ch costau lleoliad. Ni fydd hyn yn newid.
Rhagor o wybodaeth
Os ydych wedi cael eich asesu, bydd y manylion cyswllt ar eich Cynllun Gofal a Chymorth.
Os nad ydych wedi cael eich asesu gan Wasanaethau Oedolion Cyngor Caerdydd, ffoniwch ein Gwasanaethau Byw'n Annibynnol ar 02920 234 234 234 i ofyn am asesiad.
Rydym yn eich annog i gael cyngor arbenigol annibynnol wrth ystyried eich holl opsiynau. Gallwch ddarganfod mwy am gael cyngor cyfreithiol ac ariannol ar wefan Age UK.
